есеп беру картасы

(Отчетная карта)

белгіленген уақыт кезеңіндегі өз әскерлерінің (күшінің) және қарсыластың ұрыс қимылының барысы графикалық түрде хронологиялық жүйелілікпен көрсетілген ұрыстық ақпараттық есеп беру құжаты. Көптеген мемлекеттердің қарулы күштерінің бөлім, бірлестік, құрама штабтарында жүргізіледі. Е.б.к. әскерлердің (күштердің) жауынгерлік тәжірибесін зерттеуге және талдап қорытуға, ұрыстық қимылдар туралы анықтама және есеп беруді құруға арналады және тарихи материалдарды жасауда қолданылады. Е.б.к-на төмендегілер түсіріледі: операция (ұрыс) барысындағы өз әскерлерінің (күшінің) және қарсыластың жағдайлары туралы талдап қорытылған мәліметтер; өз бірлестігінің (құрамасының, бөлімінің) және қоса берілген сүйемелдеуші әскерлердің (күштің) және көршілердің жауынгерлік міндеттері; қойылған жауынгерлік міндеттерді орындаудағы өз әскерлерінің (күштерінің) және көршілердің іс-қимылы және жеткен жетістіктері; қарсыластың іс-қимылдары. Ұрыстық қимыл жүргізу кезінде жаппай жою қаруы қолданылғанда Е.б.к., сондай-ақ екі жақтың ядролық соққы беруі, олардың әскерлері және басқалары залалдаған, қиратқан аймақтары да көрсетіледі.